首次做親屬以外的babysitter

話說7月時Ms Vaitl發現我住既地方同佢好朋友係同一度
於是有次過黎佢朋友度時約埋我~大家認識認識
但主要目的係佢朋友兩公婆今個月有2日要去朋友婚禮
唔方便帶小朋友去，希望我到時幫忙照顧佢地2個仔仔
初初我問媽媽意見時，佢坦然唔比我去，怕小朋友有事我負責唔起
不過後來見過2個小朋友後，見佢地好乖加上我地住得近
就決定偷偷幫忙~
照顧小朋友既經驗我地都算多既
事因我同家姐係表兄弟姊妹中最大2個
除左3個移民左去加拿大既，以下4個連我細路
我地都要係大人聚埋時照顧班細既..

琴日就係我首次成為親屬以外的babysitter...
不過老實講我冇照顧過佢地~只係人地屋企由6:00呆到11:00
事因主人家唔想比小朋友知佢地出去
出門前已經哄曬2個訓..期間我係飯廳訓左一陣..溫書..作文..睇小朋友英文故仔書..仲去左偷窺
冇錯，係偷窺..
主人家客廳有窗台..改成梳化床...我坐係窗台..見到對面大廈..身邊又見到個望遠鏡..
我呢個八婆就走左去偷窺..睇人地做咩..大家都專心睇電視..
我冇得睇就唯有睇人地啦~~:p
不過最後怕人地見到我~所以又唔睇~
結果主人家返黎見我懶乖咁溫書~比左$220我
扣左飯錢..我坐幾個鍾就有200..平均$40個鐘
咁筍..我都唔好意思收..
不過小兔d野花左好多錢..我自己補完呢$220都未夠填數..........